മഞ്ചേരി: ഫെഡറേഷന്‍ കപ്പ് ടിക്കറ്റ് വില്‍പ്പന തുടങ്ങിയ ആദ്യദിനം വിറ്റത് 10 ലക്ഷം രൂപയുടെ ടിക്കറ്റ്.
കനറാബാങ്കിന്റെ മഞ്ചേരി , മലപ്പുറം ശാഖകളില്‍ ഉച്ചയോടെതന്നെ ടിക്കറ്റ് തീര്‍ന്നു. 60 രൂപയുടെ 2000 ടിക്കറ്റുകളാണ് വിറ്റത്. 5500 സീസണ്‍ ടിക്കറ്റുകളില്‍ 3000ഉം വിറ്റുപോയി. വി.ഐ.പി ഗാലറി, കസേര ടിക്കറ്റുകള്‍ അടുത്തദിവസങ്ങളില്‍ വില്‍പ്പന നടത്തും.
മഞ്ചേരിയിലെ കനറാ ബാങ്കിന്റെ രണ്ട് ശാഖകളിലും ഞായറാഴ്ചയും ടിക്കറ്റ് വില്‍പ്പന നടത്തുമെന്ന് അറിയിച്ചിട്ടുണ്ട്. കോഴിക്കോട്, പാലക്കാട് ജില്ലകളിലെ ടിക്കറ്റ് വില്‍പ്പന കേന്ദ്രങ്ങളിലും നല്ല തിരക്കനുഭവപ്പെട്ടു. മഞ്ചേരിയിലെ ശാഖകളില്‍ രാവിലെ ഒമ്പതുമണിയ്ക്ക് മുമ്പുതന്നെ ക്യൂ പ്രത്യക്ഷപ്പെട്ടു. രണ്ട് മണിക്കൂറിനുള്ളില്‍ തന്നെ ആദ്യദിവസത്തെ വില്‍പ്പന അവസാനിച്ചത് ഫുട്ബാള്‍ പ്രേമികള്‍ക്ക് നിരാശ സമ്മാനിച്ചു. തുടക്കത്തില്‍ ഒന്നില്‍ക്കൂടുതല്‍ ടിക്കറ്റ് നല്‍കിയെങ്കിലും പിന്നീട് ഒന്ന് മാത്രമാക്കി ചുരുക്കി.

മലപ്പുറം: മഞ്ചേരി സ്‌പോര്‍ട്‌സ് കോംപ്ലക്‌സില്‍ നടക്കുന്ന ഫെഡറേഷന്‍ കപ്പ് മത്സരത്തിന് സ്‌പോണ്‍സര്‍മാരെ കണ്ടെത്താന്‍ അഖിലേന്ത്യ ഫുട്‌ബോള്‍ ഫെഡറേഷന്റെ അനുമതി. സ്‌പോര്‍ട്‌സ് കോംപ്ലക്‌സില്‍ ആദ്യമായി വിരുന്നൊരുക്കുന്ന മത്സരമായതിനാലാണ് അനുമതി ലഭിച്ചത്. സ്‌പോണ്‍സര്‍ഷിപ്പിലൂടെ കണ്ടെത്തുന്ന തുക സ്റ്റേഡിയത്തിന്റെ നവീകരണത്തിന് ഉപയോഗിക്കും.
സ്റ്റേഡിയത്തിന് അകത്ത് ഗ്രൗണ്ട് ഒഴികെയുള്ള മറ്റിടങ്ങളിലാണ് സ്‌പോണ്‍സര്‍ഷിപ്പ് അനുവദിച്ചിട്ടുള്ളത്.
സ്‌കോര്‍ബോര്‍ഡ്, രണ്ട് ടീമുകള്‍ക്കുള്ള ബസ്, പവലിയന്‍ ഗ്യാലറിയില്‍ എട്ട് ഫ്‌ളക്‌സ് ബോര്‍ഡുകള്‍, എന്‍ട്രി പോയന്റ് എന്നിവയ്ക്ക് സ്‌പോണ്‍സര്‍മാരെ കണ്ടെത്തിയിട്ടുണ്ട്. താത്പര്യമുള്ളവര്‍ ശനിയാഴ്ച വൈകീട്ട് നാലിനകം ബന്ധപ്പെടണം. ഫോണ്‍: 9447945706.
സ്‌പോണ്‍സര്‍മാരെ കണ്ടെത്തുന്നതിന് കളക്ടറേറ്റ് സമ്മേളന ഹാളില്‍ യോഗം ചേര്‍ന്നു. അഡ്വ. എം. ഉമ്മര്‍ എം.എല്‍.എ, ജില്ലാ കളക്ടര്‍ കെ. ബിജു, ജില്ലാപഞ്ചായത്ത് വൈസ്​പ്രസിഡന്റ് പി.കെ. കുഞ്ഞു, എ.ഡി.എം പി. മുരളീധരന്‍, സ്‌പോര്‍ട്‌സ് കൗണ്‍സില്‍ ജില്ലാ പ്രസിഡന്റ് എ. ശ്രീകുമാര്‍, പഞ്ചായത്ത് പ്രസിഡന്റ്‌സ് അസോസിയേഷന്‍ ജില്ലാ പ്രസിഡന്റ് സി.കെ.എ. റസാഖ്, ജില്ലാപഞ്ചായത്ത് അംഗം ഉമ്മര്‍ അറയ്ക്കല്‍, വ്യാപാരി വ്യവസായി പ്രതിനിധികള്‍ എന്നിവര്‍ പങ്കെടുത്തു.

മലപ്പുറം: ഫെഡറേഷന്‍കപ്പ് ഫുട്‌ബോളിനെത്തുന്ന കാണികളുടെ സൗകര്യാര്‍ഥം ബസ്സുകള്‍ക്ക് സ്‌പെഷല്‍ പെര്‍മിറ്റ് അനുവദിക്കും.
സാധാരണ സര്‍വീസിന് ശേഷമാണ് പെര്‍മിറ്റ് അനുവദിക്കുക. താത്പര്യമുള്ളവര്‍ ഫീസടച്ച് ആര്‍.ടി. ഓഫീസില്‍ അപേക്ഷിക്കണം.